علا وحيد
العيشه بقت مسكنات، تعب مسكنات، مشاكل مسكنات، زهق مسكنات، وتيجي تدور على الوجع بعد كل المسكنات تلاقي المرض ذاد ويقولك ملوش علاج دا عايز بتر....
طب ما كان من الاول متجيش على نفسك، قعدت تيجي عليها لحد ما هلكتها، وشيلت نفسك فوق طاقتك، لحد معدش فيك نفس..
طيب كانو فادوك بايه اللي قالولك اتحمل، والدنيا كلها مشاكل، ولا اي حاجه....
منهم اللي هيقولو عليك خفيف، ومنهم اللي هيقولك مكناش نعرف انه هياثر عليك بالشكل الكبير دا...
طيب لما عرفتو انه أثر عليا خلاص هتعمل ليا ايه..
هقولك بردو معلش..
الدنيا فيها وفيها، اللي خلق الدنيا مقلش كده، طاقتك غير طاقتي، قلتلك مش قادر متحملنيش فوق طاقتي،
بقيت حتى مش محصل بني آدم،
بقيت بواقي بشر مستهلك ملوش قيمه...
حتى الفرح لو جه لحد عندي مابيتحس ولو دقيقه.
والضحكة تطلع ميته مني وحزينه.
متشيلوناش فوق طاقتنا، دا ربنا اللي( قال لايكلف الله نفسا إلا وسعها) ارحمونا ياولاد اللذينه.