النهارده هحكي حكايه عجبتني اوي. كان في مره اب وبصراحه مش الاب دا بس، في بيوت كتير الاب دايما يتخانق على النور المفتوح، وعلى فتح التلاجه، وعلى سيبان الميه، المهم على اي إهمال يتخانق. وعلى انك تاخد فلوس منه وتروح تجيب بيها حاجه ملهاش لازمه. وكان أصحاب البيت سواء ست البيت الام، ولا الاولاد يفضلو يتأفأفو منه ومن تصرفاته، وكان اعتقادي ان الراجل دا بخيل. ومكنتش بحبه عشان كان مزنقها اوي عليهم.
لحد الراجل دا ما اتوفى....
لقيت الست اللي كانت بتشتكي قلبت زيه، وبقت بتتخانق على نفس الحاجات، وبتعمل نفس التصرفات، الفضول خدني وخلاني روحت سألتها!
ياست مش انتي كنتي بتضايقي من اللي جوزك بيعمله ايه اللي خلاكي تعمليه؟
قالتلي مكنتش مكانه، ولا كان عندي مسؤليه، ولا كنت بشوف اللي هو مخططله. كنت بعدي يومي وخلاص، عايزه اكل احلى حاجه، ويبقى عندي احسن حاجه، واجيب اللي نفسي فيه، وفجأه لقيت نفسي مسؤله... ومعايا مبلغ لازم يكفي الشهر. اكل وشرب ونور ومايه وغاز، وازمات فجائيه. تعب، حاجه باظت، ومطلوب مني اوفر عشان مستقبل ولادي، وان كل ما احافظ على اللي موجود. مش هجيب غيره. وقدر اجبلهم حاجه تفيدهم. ولو اتوفر اكتر هعملهم اللي بيحبوه.
وعدت الايام والسنين والابن اتجوز.. ولقيته بيعمل نفس اللي الاب عمله. والأم عملته. سألته ولادك مضيقين من تصرفاتك بتعمل كده ليه؟ قال ما كل حاجه ليهم، مش عايزهم مسرفين، عايزهم يحافظوا عل اللي معاهم عشان يبقى معاهم بدل الحاجه حاجتين.
متبصوش ابدا لمظاهر الأمور ميبقاش عندك حد بيعمل عشانك كتير، وتبص لحاجه واحده انت شايفها وحشه من وجه نظرك، وتتهمه انه وحش، وممكن تكون بتتمناله الموت. بس بعد ماتفتقده تعرف قد ايه كان بيحبك. وخايف عليك. اخشوشنو فإن النعمه لا تدوم.
دمتم في امان الله