مابين نقطة مش باينة ونقطة خاينة..
نقطة مش مفهومة ونقطة بألف معنى.
ونقطة واقعة لو حطوها
تعدل المعنى..
ونقطة تضيع المعنى وتضيعنا..
ونقطة فى آخر الجملة بالأمر توقفنا.
ونقطة نناقشها يا نرفضها يا تقنعنا..
ونقطة مش فى مكانها فى الغلط توقعنا.
ونقط نوصلها نكمل صورة تمتعنا..
تايهين بين كلمة وحرف ومعنى..
ونقطة على حرف فى كلمة..
توزن القول وتحلى كلام المغنى..
واللى عاوز يفهم نقطة نقطة يسمعنا..
بنقطة بدأنا كلامنا وبنقطة ختمنا..