إذا بالحب في عندك كرامي
انا جبران يا سلمى كرامي
أنا مجنون ليلى بحد ذاتو
و عإسمي فَرّخت كل الأسامي
أنا الحب و أنا مركب نجاتو
حَمَلت العشق عجناح اليمامي/ ة
أنا حلم البيحقق معجزاتو
الهوى يا ست دمعة و إبتسامي/ة
جاب القمر من سابع سماتو
و زرعو على خدود الورد شامي
الهوى مرجوحة الطفل و هناتو
و بسمة مع (انكغا) و شو هضامي
الهوى ببحر الوفا ناسخ أياتو
و على الكرسي الرسولية عَمامي/ة
الهوى أَلْـيَن من اللين بقساتو
الهوى يا شفاف فستق عا قضامي
الهوى الشهد المصفى في حلاتو
رغم عقص النحل و العقص دامي
الهوى نسمة. الهوى بسمة فلاتو
الهوى بالعاصفة درب السلامي/ة
اللي عايش بالهوى عايش حياتو
باقي عِشِق تا تقوم القيامي
الهوى العشق الحقيقي و قدسياتو
بإخلاص و وفا و صِدق و مقامي/ة
كتار من الهوى في ناس ماتو
و إذا ما بالهوى عشتي و متي
بدك تاكلي العشرة ندامي/ة
الشاعر… د.علي مسلم عجمي
لبنان