لو بتعمل حاجه وحشه قاوم ومتعملهاش، او حاول تقليلها، لو بتتكلم على حد اسكت، هي مش بكتر الكلام، هي مش حرب، اللي هيفوز بكتر الغلط حسابه عند ربنا كبير، انت خسرت قدام اللي خلقك، وكسبت قدام الناس، اختار انت... .
متبداش بالخنقه والغلط فى المقابلات، صفي نيتك، وسيب اللي قدامك يغلط، بس متوقعوش فى الغلط، متستذكاش على اللي خلقك، الأعمال بالنيات. يمكن انت مشحون بس هو نيته يصفي الدنيا هو كمان.متبداش بالغلط. ومتستناش غلطه عشان تتفتح ومتسكتش. متقفش على الواحده.
أملي قلبك بطاقه الحب والأمل والتفاؤل ولو حسيت لحظه ان اللي قدامك عايز يبدأ بالخير ساعده، افتح بيبان قلبك اكتر منه بالخير.
اكيد مش كل الناس ينفع معاها دا في ناس بتبقى عايزه توقعك فى الغلط سيبك منهم، ومتشغلش بالك بيهم بس صفي قلبك عشان نار الضيق مش هتحرق غيرك، ونار الغل اللي جواهم هتحرقهم فى يوم من الايام، وزي ما دايما بنقول في ناس البعد عنها غنيمه، قلبك هو اللي هيحس أدام مش مرتاح خليك فى حالك، خليك دايما متوازن.
افرحو بشعائر دينا الدين الإسلامي جميل كله سلام وتسامح، الغلطات لو صغيره عديها، هتتاذي اوعي تاذي مافيش أسهل من الاذيه، وخليك دايما فاكر ان المؤمن القوي عند الله خير من المؤمن الضعيف. والقوة انك تسامح، و العفو عند المقدره. اوعي تتلهي بهموم الدنيا وخليك عارف ان تعظيم شعائر الله من تقوى القلوب.
كل سنه وانتو طيبين ورمضان كريم ومن بعض قريبين شهر كريم مليان بالخير.
انها افضل التجاره. التجاره مع الله اعمل الخير وخد أضعاف اللي هتعمله حسنات.
دمتم في امان الله.