اجري التحقيق / د حسن سلام
في البدايه أود التوضيح انا وكثير من حزب الكنبه من بدايه الازمه
ونحن نسخط وننتقد ايه الإهمال ده وايه الفضيحه العالميه دي واحب اقولكم نبذه عن
حزب الكنبه ناس قاعده في الانتريه او عالسرير بتفتي وتصدر قرارات وهي لم تحرك
ساكنا مثلا وهم يشاهدون مباره كره قدم يلعنون اللاعب اعمل كذا واعمل كذا وهو عمره
لم يرى ملعب علي الطبيعه او يلمس كره بيديه وهكذا في كل مناحي الحياه تجد من يفتي
وهو لا يعلم شيئا من يفتي في الدين وهو لم يقرأ ايه واحده ومن يفتي في السياسه
وهكذا ولكن انا اختلف عن هذا الحزب بالبحث والوصول الي الحقيقه وعملا بمبدأ اسألوا
اهل الذكر توجهت الي خبير متخصص في الإنقاذ للسفن وتعويمها القبطان محمود عبد
الدايم صاحب شركه سي كوين واحد تلاميذ البحريه المصريه العريقه
د حسن سلام :ايه موضوع السفينه
قبطان محمود عبد الدايم:
طول عمري شغال في الإنقاذ ناس
كتير اشتغلت معايا وتعلمت علي ايد خبراء الإنقاذ في القوات البحرية واشتغلت في
شركات انقاذ عالمية ومقدرش اقول ممكن نعمل ايه او متعملش ايه غير لما اكون موجود
لان في معطيات كتير هي اللي بتحدد اتخاذ القرار والأهم من كده أن الناس اللي شغاله من أكفاء الناس في المجال علي مستوي العالم
فعشان تعرف المختصر المفيد في موضوع شحط ناقلة الحاويات العملاقة EVER GIVEN
والتابعة للشركة اليابانيةالعملاقة برضه EVERGREEN ودي من أكبر الشركات بعد ميرسك
خد شوية معلومات بسيطة كده الأول
السفينة من آخر أجيال سفن نقل الحاويات اللي بتشيل أكتر من ٢٠ ألف
حاوية مكافئة ٢٠ قدم ، أكبر ناقلة في العالم دلوقتي ٢٤ ألف حاوية
حمولة السفينة الحجمية ٢٢١٠٠٠ GT يعني الحمولة الوزنية ممكن تتجاوز
أكتر من ٤٠٠ ألف طن وزن، على حسب وزن البضاعة بتختلف طبعا
طول السفينة أكتر من ٤٠٠ متر والعرض ٥٩ متر
الغاطس بقى ودا الأهم ١٥،٥ متر اللي كانت مبحرة بيه في قناة السويس
يبقى مبدئيا كده إحنا قدام جبل عائم على وش المية
د حسن سلام :طيب إيه اللي حصل بالظبط
وليه الموضوع كبير كده
قبطان محمود عبد الدايم :
أولا حصل فقد في القدرة الكهربية على الناقلة black out ، من تصريح وكيل السفينة وكالة الخليج GAC من
الآخر كده مشكلة في المولدات الرئيسية
دا بيترتب عليه إيه بقى..
فشل في منظومة الدفع والتوجيه، مهو مفيش كهربا تشغل طلمبات الزيت
والتبريد للماكينات الرئيسية وكمان تعطل طلمبات تشغيل الدفة اللي هيا هيدروليك
وحجمها كبير جدا
د حسن سلام :طيب هل مفيش عالمراكب منظومة طوارئ في الحالات دي
قبطان محمود عبد الدايم :في طبعا ، وده إلزامي وبتدخل أوتوماتيك
خلال ٦٠ ثانية
د حسن :طب فين المشكلة هنا، قبطان محمود:المشكلة مش هتبقى موجودة
لو إنت ماشي في بحر مفتوح، السفينة هتنحرف عن المسار شوية وتبقى زي الريشة العايمة
وبعدين كل شيء يرجع لأصله بعد تشغيل المكن تاني وتوجيه الدفة ويتعدل المسار
د حسن :طب في قناة السويس إيه المشكلة ؟
قبطان محمود :المشكلة مش في قناة السويس بس، لكن في كل الممرات
المائية الضيقة، لو فقدت التوجيه والريح كان عالي دا هيؤدي لانحراف مسار الناقلة،
ومش هتلحق تعمل حاجة والمركب هتركب أجناب القناة مع سرعة واتجاه الريح، بسبب فشل
في منظومة التوجيه للدفة أو عطل مفاجيء في
الماكينات زي ما قلنا، أو خطأ بشري من المرشد أو الربان
قناة السويس بقى ليها طابع خاص لأن القاع رملي، الملاحة بتكون في
المنتصف تماما عشان مقطع القناة حرف V فطبيعي إن الأجناب غاطسها قليل ومش
هتقدر تحافظ عليها بمقطع حرف U بعد التكريك، مع العلم إن عملية التكريك منتظمة في القناة
منذ إنشائها ، ودي من ضمن خطة الصيانة الدورية للقناة، عشان حركة السفن نفسها
بتقلل الغاطس بالتدريج مع التيارات الدوامية اللي بتحصل في قاع القناة من حركة بدن
السفن، والدوامات دي بتعمل تفريغ تحت بدن السفينة بيسحب الرملة من على الأجناب
كمان بيسموه (أثر سكوات) ، وبتكون السفن أكثر قابلية للجنوح والشحط كل ما زادت
سرعتها، عشان كدة السرعة متحددة في القناة ب ٨ عقدة، وبيتم مرور السفن في القناة
بشكل قوافل بين كل سفينة والتانية ٢ ميل بحري
وعلى كل سفينة مرشد واتصال دائم بالمراقبة في القناة، مع وجود
قاطرات مصاحبة للقافلة لسرعة التصرف لو حصل انحراف وجنوح لإحدى السفن، عشان منعطلش
باقي القافلة، وفي قافلتين قافلة شمال وقافلة جنوب، الشمال نازلة من بورسعيد
والجنوب طالعة من السويس، قافلة الشمال بتخزن المراكب في البحيرات في الاسماعيلية،
لحد ما قافلة الجنوب تعدي متجهة لبورسعيد، وبعدين تنزل التانية متجهة للسويس، ودا
النظام المعمول به في القناة
د حسن :كلام جميل إيه اللي حصل طيب..
قبطان محمود:الناقلة EVER GIVEN
انحرفت نتيجة فقد التوجيه،
ولأن سرعة الريح كانت عالية جدا، ففقدت السيطرة واستعرضت بعرض القناة وقفلتها
خالص، تخيل مركب طولها ٤٠٠ متر واقفة بعرض القناة اللي هيا ٤٠٠ متر برضه، فقعدت
بلغة أهل البحر بمقدمتها ومؤخرتها على جانبي القناة، وكلبشت في الطين ومقدم ومؤخر السفينة دي أساسا مناطق شغل القاطرات اللي
بتشد وتدفع على المراكب، عشان يبقى في عزم في التحريك والمركب نفسها تبقى ذراع عزم
على المرتكز اللي شاحط، هنا بقى المركب شحطت من الجانبين، فالقاطرات اللي اتبعتت ٦
قاطرات وهيا عملاقة بالمناسبة فيهم بركة ١ أكبر قاطرة في الشرق
الأوسط ١٦٠ طن شد والباقي ٧٠ و٨٠ طن ، ملحوظة طن الشد البحري بألف طن من وزن
المركب، الموضوع صعب جدا مع الأسف، الشغل هيبقى شد بس بالحبال مش تدفيع ودا أصعب،
لأن القاطرات نفسها ممكن تشحط هيا كمان، حتى تخفيف الحمولة محتاج وقت كبير وامكانيات
أكبر، المعلومات دلوقتي إن اللي شغال ٩ قاطرات بعد الاستعانة بقاطرتين كبار واحدة
من الأردن والتانية رافعة علم بنما، دا غير القاطرة عزت عادل انضمت برضه ودي ١٦٠
طن شد كمان
الكراكة مشهور ودي أكبر كراكة في الهيئة راحت للموقع للتكريك تحت بدن السفينة لرفع الشحط وزيادة العمق
د حسن :انا وكثير مثلي بيسالوا هل الموضوع فيه تقصير،
قبطان محمود :أؤكد لحضرتك لأ ، إنت بتتعامل مع كارثة وبتبذل أقصى
جهد عندك، مش هقولك شحط البواخر بيحصل في كل حتة، بس هقولك إن المنطقة دي أسوأ
منطقة ممكن تشحط فيها باخرة وكمان بالحجم ده والغاطس ده، مع ضيق عرض القناة، إنت
مش في بحر مفتوح ولا حتى بحيرة، إنت في قناة ملاحية ضيقة، وربنا يكون في عون الناس
الفنيين هناك،
د حسن سلام :في ناس بتقول وليه القناه عرضها ضيق كده
قبطان محمود :قناه السويس أعرض ممر مائي من صنع البشر قناه بنما
اقل في العرض وتوجد قناه في اليونان اقل من الاثنين موجوده بين جبلين مستحيل
توسعتها
وأود اطمئن الناس أن خطه التعويم في طريقها الي الإنجاز الكراكه
مشهور العملاقه بدأت في التكريك من بعد
وأود التوضيح ان كثير من دول العالم عرضت المساعده منهم الولايات
المتحدة الأمريكية وتركيا والعديد من الدول ولكن الهيئه رفضت لقدرتنا علي التعويم
بما نملك من معدات وخبرات
د حسن سلام :شكرا لحضرتك علي الشرح الوافي والتوضيح
