محمود سلام
مصر بلدك... مش شوية
بسم ربي وبعد حمدي.. هحكي قصه ميه ميه
قصه فيها عبرة لينا.. اسمعوا بقلوب أمينه
قبل ما أحكي بس صلوا ع النبي خير البريه
قصة خدها وقيس عليها.. هبتديها.. أنا قلت فيها :
ضاقت الدنيا في عنيا بعد ما كانت زهية
قلت اروح بره البلد دي يمكن أتغير شوية
كنت فاكر إني هبقى ضمن وزراء المالية
جريت عشان أعمل جوازي وفي يومين جبته في إيديا
خلاص نويت إني أسافر شفت مصر بعين رزية
ماشي يابني الرأي رأيك بس راجع بكرة ليا
لما تعرف إن بلدك.. هيا حضنك هيا سندك
فيها أمك فيها ولدك... تبقى قد المسؤليه
مش هاممني أي كلمه.. الحال هناك في الميه ميه
وفي شهور بعد أما سافر همسك الدنيا ف إيديا
روح هناك وفي قلبي ليك كلمتين.. دعوه.. ووصيه
مصر بلدك نور عنيك. في انتظارك يا عنيه
مهما تبعد مهما تقسى مصر دي أجمل هديه
مشيت هناك بعد الوداع لقيت هناك غش وخداع
لا الحال تمام ولا أي حاجه عرفت إنها تمثليه
صرخت صرخه وكنت فاكر.. حد هيطبطب عليا
قالوا ياللا لبدك ارجع.. ولا نعملك قضيه؟
قلت آااااه راجع يابلدي إنتي حضني و إنتي سندي
إنتي نبضي جوه روحي في النهايه انتي اللي ليا
تعالى يابني ارجع لحضني وبدراعها طوقتني
شافت الدمعه في عنيا وف عنيها الخوف عليا
مسحت دموعي قالتلي قوم مصر بلدك هيه هيه
نصيحه مني لكل واحد فاكر إن الغربه غيه
فاكر إنه هيبقى باشا الغربه يابني مسؤليه
الغربة يابني تمنها غالي تبقى فيها انتا الضحيه
لكن العيشه في بلدك باختصار عيشه هنيه
عيشه حلوه وشغله حلوه حتى لو كان باليوميه
ابني عمر جوه بلدك... هات ايديك قوي ايديا
مصر بلدك فيها خير مصر بلدك مش شويه .