كتبت ذكرى محمد
زمان كنا بنتكسف نضحك بصوت عالي
ولما نمشي في الشارع كنا بنبص في الأرض وكأن حاجة رايحة مننا وبندور عليها
دالوقت الأمر اختلف تماما
وخاصة لما رجع أبو أحمد لقي ام احمد بتتكلم في الفون وكل شوية تقول لا حول ولا قوة الا بالله العلي العظيم
أبو أحمد فاستغرب وسأل نفسه هو في ايه
وبدأ يقلق ، انت ياست في ايه حد جراله حاجه،و أم أحمد تشاور له انه يستنى شويه لما تخلص وشغالة لا حول ولا قوة الا بالله العلي العظيم واتوب اليه
أبو أحمد صبره نفذ ومد ايده وشد الفون من أيدها وسمع جارتهم أم حسين وهي بتحكي لها عن جارتهم أم فلان أنها عملت
فيديو ونشرته راح أبو احمد بص لمراته وقالها اقفلي مع ام حسين وحكي لي ايه اللي حصل ، أم أحمد مكدبتش خبر وفضلت تحكي ان جارتهم ام فلان عمل تيك توك واتصورت وهي بترقص علي مهرجان ونشرة الفيديو والفيديو انتشر بشكل وحش والكل شافها
والناس حكو لجوزها الغلبان هي كانت مفكرة ان جوزها مش هيعرف بس ولاد الحرام قالوله رجع الراجل شايط للبيت
وحلف عليها بالطلاق بس بعد ايه بعد الناس ما اتفرجت
أبو أحمد كان بيسمع ومش مصدق اللي بيحصل لان الست ام فلان دي عندها 50 سنة
وبدأ أبو أحمد يسأل نفسه هي الناس اتهبلت على كبر ولا ايه
الله يرحم أيام زمان كنا نتكسف نبص في المرايا مش كدة ولا ايه