مهرجان همسة الدولى ٢٠١٦
.......
حدا الساقية
...... ......
الكل عاود ف الاجازة
وانت لأ
مع امك
من بداية النور ماشق
خبزلتك العيش
اللى كنت بتعشقه
دبحتلك البطة السمينة تقوتك
ياعريس وحانت فرحتك
قاعدة عروستك
ف انتظارك ياولد
والكل قاعد
لجل يحضر زفتك
الكل عاود ف الاجازة
وانت لأ
مع ان امك من ساعات
راحت حدا الساقية
تشوفك ع الطريق
وقف الغريب جنب الصديق
وعروستك اللى ايديها ف الحنة
هى كمان مستنظراك
وف قلبها الحلم البرئ
طب ليه ما جيتشى ف الميعاد
مع ان شوفت الكل عاد
ايه اخرك عن زفتك
او عن خبيز امك ياواد
ياصقر قاعد ع الحدود
لا كان هجوم للدبابات
ولا كنا بنحارب يهود
ولا حتى سكة رجعتك
كان فيها مزروع البارود
ايه اخرك
د.احنا هنا مستنين
يا ضنايا قولى روحت فين
وليه صحابك حزناين
مع ان واقف ع الشمال
صفين ملايكة بيضحكوا
والحور ع الجنب اليمين
ف عرفت انك جيت عشان
زفة اله العالمين
بس اللى ضيع فرحتى
موتك ما كانش بايد عدو
د.اخوك وغير مذهبه
وارتاح ف حضن المجرمين
ما فهمش ايه معنى الوطن
ولا ايه يكونوا المسلمين
انت اللى عايش هو مات
ملعون ف كل كتاب ودين
صدقنى يا اطيب ولد
كل اللى خانك ميتين
انت اللى عايش ف السما
ف الجنة طاير بجناحين
والارض دمك رح يكون
كما طير حمام
رفرف مابين القبلتين
الكل عاود ف الاجازة
وانت لإ
علشان مافيش ابدا ملاك
بيعيش
ف دنيا الشياطين
محمد ابو العبادى