وصية أب
يا بني عاشر الناس بالطيب والود
وخليك في حالك
يا بني حاسب من الناس
دي بعض الناس مهالك
الناس معادن والقلوب أسرار
وخالق الناس عارف ضمايرها
صاحب جدع وقت الضيق تلاقيه
سفينه جايه بما يشتهي حالك
عاشر بالأدب
تلاقي الاغراب معاك في الضيق والفرح
قبل عمك وخالك
حتى عدوك يكون وياك
يا بني أحسب كلمتك قبل ما تخرج
الكلمة زي الرصاصه إن خرجت تاني
ما ترجع
عاشر بالأدب يا بني وكن واعي
دي أقل كلمة في ابن الاصول توجع
وأنا جربت قبلك
ياما صدمات على شط الفؤاد ركنت
شيبت شبابي قبل ميعاد الشيب
ضربت روحي تحت تراب جلدي
خلعت جذور الصبا وعمري ما قلت
العيب
ضربتني رياح الناس ووقفت صامد
كنت خايف ينهشو لحمي في لحظة
غيب
نصبت عودي والجذع مخلوع
خوفت أقول الاه الناس تقول اتكسر
واللي ينكسر الناس بتشمت فيه
وعمري ما ظنيت إن الأخ يفرح
في كسر أخوه
يا بني عاشر بالأدب وارتضي المكتوب
وخليك فاكر القلوب بتتغير حسب
مزاج الناس
خليك حساس واقرأ عيون الناس
وكل مكتوب يبان من العنوان
زي الخسيس يبان من اعذاره
والنفيس يبان من جوهر أسعاره
صاحب راجل تعرف افعاله
ولا تصاحب خسيس ينكر أفعالك
ابن الأصول زي الربيع تفوح ازهاره
والردي زي الخريف تسقط أوراقه
يا بني عاشر بالأدب
وخليك فاكر الناس معادن والقلوب أسرار
أوعى تعاشر الواطي والرقاص
يوم تلوم عليه الناس يلوم على الزمار
يا بني عاشر بالأدب وخليك في حالك
بقلمي سيد ابوزيد